ríkisábyrgð á lántöku Tryggingarsjóðs innstæðueigenda og fjárfesta.
Frú forseti. Ég tek undir með hv. þm. Birgi Ármannssyni að það var ánægjulegt að sjá hv. þm. Árna Þór Sigurðsson heiðra okkur með nærveru sinni . Hann kom hingað upp til þess að fullvissa okkur um það að hæstv. ráðherrar og hv. þingmenn væru hér í húsi og væru svo sannarlega að hlusta á okkur og ég get auðvitað ekki annað en trúað því sem þingmaðurinn segir.
En ég hef ítrekað bent á það í þessari umræðu, bæði í ræðu minni og líka í athugasemdum við fundarstjórn forseta, að það er einfaldlega ekki nóg. Ég var í minni 40 mínútna ræðu í gær með margar spurningar til þriggja ráðherra sem sáu sér ekki fært að sitja hér en ég var fullvissuð um það trekk í trekk að þeir væru hér í húsi. Því er kannski spurning um að beina því til þingmannsins hvort hann hafi þá tök á því að fullvissa mig um það að spurningum mínum verði svarað af þessum ágætu ráðherrum. (Forseti hringir.) Eða telur hann nóg fyrir lýðræðislega umræðu að fólk sitji og hlusti?