ríkisendurskoðandi og endurskoðun ríkisreikninga.

Herra forseti. Ég vil í upphafi máls míns rifja upp í örstuttu máli hvað frumvarpið um breytingu á lögum um ríkisendurskoðanda og endurskoðun ríkisreikninga varðar mest. Það segir hér í greinargerðinni, með leyfi forseta:

„Frumvarpið felur í sér að skerpt er á því hvenær lög um endurskoðendur og endurskoðun, sem samþykkt voru á síðasta löggjafarþingi, taki til starfsmanna Ríkisendurskoðunar. Með frumvarpinu er eytt óvissu um það hvort skylda endurskoðenda til að framkvæma endurskoðun í endurskoðunarfyrirtæki og undir merkjum lögaðila taki til starfsmanna Ríkisendurskoðunar.“

Þetta er sem sagt í hnotskurn það sem frumvarpið fjallar um. Það segir líka í greinargerðinni og ég held að það sé hægt að láta þess getið einnig, með leyfi forseta:

„Í nýsamþykktum lögum nr. 94/2019 er sú krafa gerð að endurskoðun fari fram í endurskoðunarfyrirtækjum með starfsleyfi sem séu rekin í sjálfstæðum félögum. Fram hafa komið efasemdaraddir um að Ríkisendurskoðun og þeir endurskoðendur sem starfa hjá embættinu geti endurskoðað ársreikninga hlutafélaga og sameignarfélaga þar sem ríkið á helmingshlut eða meira, samanber b- og c-lið 1. mgr. 4. gr. laga nr. 46/2016, öðruvísi en í félagi sem Ríkisendurskoðun eða hlutaðeigandi starfsmenn rækju. Frumvarp þetta miðar að því að eyða slíkri óvissu og taka af allan vafa um að ríkisendurskoðandi geti framfylgt lögbundnum skyldum sínum án þess að það sé gert í sérstöku félagi.“

Þetta vildi ég að fram kæmi áður en ég færi yfir það nefndarálit sem nú liggur fyrir frá stjórnskipunar- og eftirlitsnefnd. Mig langar að fara yfir þetta nefndarálit, með leyfi forseta, eins og það kemur. Þar segir:

„Nefndin hefur fjallað um málið og fengið á sinn fund Skúla Eggert Þórðarson ríkisendurskoðanda og Guðrúnu Jenný Jónsdóttur frá Ríkisendurskoðun og Þórhall Vilhjálmsson og Laufeyju Helgu Guðmundsdóttur frá skrifstofu Alþingis.

Nefndinni bárust umsagnir frá endurskoðendaráði og Ríkisendurskoðun.

Með samþykkt laga um endurskoðendur og endurskoðun, nr. 94/2019, var gerð sú breyting að endurskoðun skyldi aðeins fara fram í endurskoðunarfyrirtækjum sem endurskoðendum varð skylt að stofna félag um. Í kjölfarið var velt upp því álitamáli hvort endurskoðendur sem starfa hjá Ríkisendurskoðun gætu sinnt endurskoðunarstörfum nema í gegnum félag sem Ríkisendurskoðun eða viðkomandi starfsmenn myndu reka. Frumvarp þetta miðar að því að taka af allan vafa um að ríkisendurskoðandi geti framfylgt lögbundnum skyldum sínum án þess að það sé gert í sérstöku félagi.

Í umsögn endurskoðendaráðs kom fram að á endurskoðendum sem starfa hjá Ríkisendurskoðun hvíli skylda að starfa samkvæmt formlegu gæðakerfi, samanber 1. mgr. 18. gr. laga um endurskoðendur og endurskoðun. Benti endurskoðendaráð á að í ljósi ákvæða frumvarpsins væri ef til vill ástæða til að kveða sérstaklega á um það hver beri ábyrgð á gæðakerfi Ríkisendurskoðunar, en í 3. málslið 1. mgr. 18. gr. laganna segir að stjórn endurskoðunarfyrirtækis skuli bera ábyrgð á gæðakerfinu.

Að mati nefndarinnar er ekki þörf á að kveða sérstaklega á um hver beri ábyrgð á gæðakerfi Ríkisendurskoðunar en það er í höndum ríkisendurskoðanda að ábyrgjast þau gæðakerfi sem Ríkisendurskoðun starfar eftir, samanber lög um ríkisendurskoðanda og endurskoðun ríkisreikninga.

Nefndin leggur til að frumvarpið verði samþykkt óbreytt.“

Að þessu nefndaráliti standa, auk þess sem hér stendur, hv. þingmenn Þórhildur Sunna Ævarsdóttir, formaður nefndarinnar, Guðmundur Andri Thorsson, Brynjar Níelsson, Hjálmar Bogi Hafliðason, Jón Steindór Valdimarsson, Kolbeinn Óttarsson Proppé, Óli Björn Kárason og Þórarinn Ingi Pétursson.

Það er von mín að þingið fallist á þetta einróma álit allrar stjórnskipunar- og eftirlitsnefndar og að málið verði afgreitt fljótt og vel.