fjáraukalög 2012.
Virðulegi forseti. Hvað varðar útgjöldin í A-hlutanum þá hefði verið mjög áhugavert að fá álit Ríkisendurskoðunar á ákveðnum spurningum sem hér eru uppi, m.a. hvernig við höldum á málefnum Íbúðalánasjóðs, hvort rétt hafi verið að taka tillit til þeirra óumflýjanlegu útgjalda sem þar eru til orðin í þessum lið eða með einhverjum öðrum hætti í bókhaldi ríkisins. Það hefði verið akkur í því fá álit Ríkisendurskoðunar og einnig þau gögn sem meiri hlutinn bað um til að leggja mat á aðra útgjaldaliði, hvort nægjanlega vel var að verki staðið, hvort ástæða sé til að ætla að enn frekari útgjöld verði, hvort við séum að mæta þeim kostnaði sem í raun og veru falli til.
Aftur þetta, virðulegi forseti: Hvers vegna í ósköpunum höfum við ekki fengið og höfum við ekki fyrir framan okkur álit Ríkisendurskoðunar og þau gögn sem minni hlutinn í fjárlaganefnd kallaði eftir?