ríkisábyrgð á lántöku Tryggingarsjóðs innstæðueigenda og fjárfesta.
Hæstv. forseti. Ég tek undir sjónarmið um að eðlilegt sé að það sé aðeins skýrt hversu lengi forseti hyggst halda áfram fundi. Ég vildi líka nefna það í ljósi umræðunnar að það er fagnaðarefni að hæstv. utanríkisráðherra er hér með okkur og hæstv. fjármálaráðherra er tæpast langt undan. Hann hefur sótt þingfundi vel meðan á þessari umræðu hefur staðið. En hvað með hæstv. efnahags- og viðskiptaráðherra?
Næsti maður á mælendaskrá er hv. þm. Tryggvi Þór Herbertsson sem hefur fjallað mjög ítarlega um efnahagslega þætti málsins og staðið að nefndaráliti þar um og hefur í fyrri ræðum um þetta mál einkum farið ofan í þá og gert mjög alvarlegar og veigamiklar athugasemdir á því sviði. Efnahags- og viðskiptaráðherra hefur þessa málaflokka, efnahagsmál og viðskiptamál, á sínu forræði og ber ábyrgð á þeim gagnvart þinginu þannig að ég spyr: Hvar er sá hæstv. ráðherra?