horfur í efnahagsmálum með tilliti til stöðu Covid-19, munnleg skýrsla fjármála- og efnahagsráðherra. - Ein umræða.

Ég þakka ráðherra fyrir svörin en ég tel þau ekki fullnægjandi. Mig minnir að þú, hæstv. ráðherra, hafir lagt fram þetta frumvarp sjálfur þannig að þú berð nú töluverða ábyrgð á þessu. Ég vil benda á að í dag er mikið talað um það sé lóðaskortur og það sé lóðaskorturinn sem valdi verðbólgunni. Helmingur verðbólgunnar er vegna hækkunar á íbúðaverði. Síðan hefur komið fram í umræðunni að það er líka mikið framboð af lánsfé sem hefur orsakað þetta. Ég vil benda á að með einföldum útreikningi sést að 7,2 milljarða endurgreiðsla á virðisaukaskatti er vegna rúmlega 35 milljarða vinnu iðnaðarmanna við viðhald. Þetta samsvarar lauslega 2.500 ársstörfum iðnaðarmanna sem í dag eru bara að vinna við viðhald en ekki nýbyggingar. Raunin er að ríkisvaldið er að færa vinnuafl úr nýbyggingum yfir í viðhald. Þetta eru ríkisafskipti sem ég tel algerlega óþörf. Þetta er sóun á peningum og ég hvet hæstv. ráðherra til að leggja til að þetta verði leiðrétt og þessu átaki verði hætt.

(Forseti (BLG): Forseti minnir ræðumenn á að beina orðum sínum að forseta.)