horfur í efnahagsmálum með tilliti til stöðu Covid-19, munnleg skýrsla fjármála- og efnahagsráðherra. - Ein umræða.

Frú forseti. Ég þakka hæstv. ráðherra fyrir svörin og er ánægður að heyra að þessari vinnu við húsnæðisliðinn sé ekki að fullu lokið. Verður fróðlegt að sjá hverju fram vindur í þeim málum.

Ég vil kannski aðeins leyfa mér að skipta um kúrs, en þó ekki, í þessari umræðu og ræða um skipulagsmál eða húsnæðisþáttinn. Ég heyrði það í umræðum hér áðan að hæstv. ráðherra nefndi mjög áhugaverðan punkt, sem ég hef nú rætt á öðrum vettvangi, sem bæjarfulltrúi í sveitarfélagi mjög nálægt okkur, í Hafnarfirði, og það er svæðisskipulag höfuðborgarsvæðisins. Ég heyrði að hæstv. ráðherra var mjög afgerandi á þeirri skoðun að svæðisskipulagið væri eitthvað sem jafnvel þyrfti að taka til frekari skoðunar. Ég verð að segja það, frú forseti, að ég er algerlega sammála hæstv. ráðherra í því og hef raunar sagt það mjög lengi. Við verðum einhvern veginn að fara að horfa á hlutina í stærra samhengi. Við erum mjög nálægt svæðum eins og Ölfusi og Reykjanesbæ og þetta er orðið eitt atvinnusvæði, má segja, en höfuðborgarsvæðið er einhvern veginn að koma í veg fyrir frekari húsnæðisuppbyggingu á þessum svæðum. Ef ég nefni Hafnarfjörð sem dæmi er staðan einfaldlega þannig hjá okkur að það er ekkert nýbyggingarsvæði í boði innan þess ramma sem við vinnum eftir, innan svæðisskipulagsins. Svæðisskipulagið er til 2040 og það eru 18 ár eftir. Þetta tengist kannski að hluta til þessum málum í bland og tengist auðvitað öðrum ráðherra líka en ég spyr með hvaða hætti hæstv. fjármálaráðherra sér þennan málaflokk.