afgreiðsla rammaáætlunar úr atvinnuveganefnd.
Hæstv. forseti. Nógu stórt er þetta mál en það versnar þegar við fáum nánari upplýsingar um hvernig það gekk fyrir sig. Þegar við erum að tala um svona stórt mál sem á að henda inn utan dagskrár á fund hv. atvinnuveganefndar, án pappíra eða gagna, þá blöskrar manni algjörlega.
Ég vil minna hæstv. forseta á að þegar tekist var á um það í hvaða nefnd málið ætti að fara þá var eitt af því sem mætti leiða til þess að menn yrðu sáttari að leitað yrði umsagnar umhverfis- og samgöngunefndar. Nú liggur fyrir að sú umsögn var að koma inn í atvinnuveganefnd, bara um Hvammsvirkjun, þ.e. þingmálið eins og það var áður. Hún kom inn í gær. Eftir það bæta menn við tillögum um allt upp í átta virkjunarkosti án þess að það fari inn í umhverfis- og samgöngunefnd. Þetta er eiginlega svo galið að maður trúir því varla að það sé að gerast, sérstaklega í þessum málaflokki þar sem hefur áður verið efnt til ófriðar. Ég held að það sé brýnt að menn fundi (Forseti hringir.) og stoppi strax og leysi málið í stað þess (Forseti hringir.) að við förum að hafa þetta (Forseti hringir.) hangandi yfir okkur í allan dag.