stjórnarskipunarlög.
Herra forseti. Ég átta mig á að þetta er mjög stuttur tími og ég fékk ekki svar við sanngjörnu laununum, en ég vil spyrja hæstv. ráðherra um hlutverk forsetans. Er ekki forsetinn í rauninni orðinn óþarfur? Ég hef reyndar lagt til áður að forsetaembættið yrði aflagt þegar forseti Alþingis er kominn með svo merkilega stöðu í þessum stjórnarskrárdrögum.
Í 17. gr. er fjallað um frelsi fjölmiðla. Þar stendur:
„Tryggja skal með lögum frelsi vísinda, fræða og lista.“
Hvað gerist ef Alþingi setur ekki lög eða tryggir það ekki nægilega vel? Væri ekki miklu betra að það stæði í stjórnarskrá: Vísindi, fræði og listir skulu vera frjáls? Þá er það alveg á tæru, þá liggur það fyrir og dómstólar geta dæmt út frá því ef ekki verða sett lög eða lögin eru ekki í samræmi við það að vísindi, fræði og listir skuli vera frjáls.
Það að setja slíkt í lög gerir þetta að hálfgildings frelsi.