lokafjárlög 2015.
Frú forseti. Ég þakka hæstv. ráðherra fyrir svarið. Við vitum auðvitað hvernig þetta er til komið. Þetta er til komið vegna framkvæmda sem áttu að vera sérstaklega fjármagnaðar en áttu í rauninni aldrei að fara inn í þetta hefðbundna form sem við þekkjum hjá Vegagerðinni, ekki frekar en göngin á Bakka áttu ekki að fara inn í samgönguáætlun en eru þar samt núna. Það kemur niður á framkvæmdafé, sem átti heldur ekki að gerast. Þetta er eitt af því sem við erum að takast á við með þessu neikvæða bundna eigin fé Vegagerðarinnar. Mér finnst það skipta máli í reikningsbókhaldinu að það sé lagfært og tekið út. Sama á í rauninni við um aðrar stofnanir sem við erum hér að fjalla um, þó að nákvæmlega þetta gildi kannski ekki um þær, ég man reyndar ekki eftir öðrum stofnunum sem eru í þessum sömu sporum. En auðvitað gildir það um svo margar.
Þetta er nákvæmlega eins og með lögregluna og sýslumennina sem fóru af stað í nýju umhverfi, sameinað og stækkað, en svo var halanum skipt á milli, sem er auðvitað óásættanlegt fyrir alla aðila í sjálfu sér að fá ekki að byrja á réttum punkti og þeir sem voru í lagi þurftu að taka á sig hluta af þessu. Ég tel því að hluti af því að innleiða þessi nýju lög sé að þessar stofnanir fái að byrja á sæmilega sanngjörnum grunni, ég tala nú ekki um þar sem markaðar tekjur hafa verið undir en eru ekki lengur, að þess sé gætt í hvívetna, sem mér finnst ekki vera að öllu leyti í framlögðu fjárlagafrumvarpi. Það er í rauninni eini möguleikinn til að þær stofnanir geti haldið áfram eða fengið eðlilegt start miðað við núverandi framlög.
Varðandi Vegagerðina, við fáum væntanlega kynningu á því í fjárlaganefnd á morgun, búið er að setja málið á dagskrá þar á morgun, hvort það er (Forseti hringir.) til staðar enn þá í bókhaldinu, þetta neikvæða eigið bundna fé.