þjónusta við fatlað fólk með langvarandi stuðningsþarfir.

Já, varðandi meintan orðhengilshátt þá hefði kannski verið réttara að segja að ríkisstjórnin hafi verið að tefja innleiðinguna frá upphafi vegna þess að sá fjöldi samninga sem er í gildi í dag er á svipuðum slóðum og hefði átt að vera á árunum 2018–2019, sem sagt á fyrstu tveimur árum innleiðingarinnar. Og núna loksins, þremur vikum áður en innleiðingin átti að vera búin samkvæmt lögunum, þá á að framlengja hana eða tefja lok innleiðingar um tvö ár í viðbót. Hæstv. ráðherra benti á að fjármagn væri tryggt til að uppfylla einhvern fjölda samninga í meðalþyngd en hann passaði sig á að vera með belti og axlabönd þegar kemur að því að ætla ekki að uppfylla þessi sjálfsögðu mannréttindi gagnvart 50 einstaklingum ef allt í einu detta inn einhverjir einstaklingar sem kostar meira að sinna. Þess vegna langar mig að spyrja hæstv. ráðherra: Hefur hann fullvissu fyrir því frá fjármálaráðherra að það verði fyllt upp í fjárveitingar til samninganna þannig að það náist þessir 50 á næsta ári og síðan það sem þarf til að fara upp í 174 á þar næsta ári?

Svo kannski bónusspurningin: Finnst ráðherranum í alvöru ásættanlegt að skilyrða mannréttindi við fjárveitingar?