staða, stjórn og starfshættir þjóðkirkjunnar o.fl.

Frú forseti. Þetta er alveg prýðileg spurning. Ég þakka fyrir hana. Ég tel sjálfur að það sé nauðsynlegt að hér fari fram þjóðaratkvæðagreiðsla þegar og ef mönnum dettur í hug að aðskilja ríki og kirkju endanlega. Það sem ég tel að gæti komið í veg fyrir það er einmitt þetta — það er hárrétt sem hv. þingmaður sagði — að það þyrfti kannski að meta verðmætin upp aftur. Ég er þeirrar skoðunar persónulega að ástæðan fyrir því að það hefur ekki verið gert sé að ríkið leggi ekki í það vegna þess að það myndi koma í ljós við þá úttekt og þá endurskoðun hversu hlunnfarin kirkjan var á sínum tíma við þetta samkomulag. Ég er ekkert viss um að ríkið hefði endilega efni á því að skilja á milli ríkis og kirkju með endanlegum hætti ef það ætti að reiða af hendi sanngjarnt gjald fyrir þær eignir sem undir liggja.