staða, stjórn og starfshættir þjóðkirkjunnar o.fl.

Frú forseti. Hæstv. ráðherra hefði auðvitað átt að fá lengri tíma núna eins og áðan. Ég biðst afsökunar, það var ekki ætlun mín að leggja hæstv. ráðherra orð í munn. Ég var að leggja út af orðum hennar í framsöguræðunni í gær og þessi vangavelta hæstv. ráðherra, sem ég ætla að leyfa mér að kalla svo, í ræðunni tengdist, að ég held, ekki beint efnisatriðum frumvarpsins. Hún var almenn vangavelta um stöðu þjóðkirkjunnar, þróunina í breyttu samfélagi, eins og hæstv. ráðherra orðaði það. Það var alls ekki ætlun mín að leggja hæstv. ráðherra orð í munn. Ég er mjög ánægður að heyra að skoðun hæstv. ráðherra sé mögulega ekki eins einörð í þeim efnum og ég upplifði þegar ég hlustaði á ræðu hæstv. ráðherra af mikilli samviskusemi í gær. Ég held að við munum einhenda okkur í að verja stöðu þjóðkirkjunnar í íslensku stjórnarskránni, (Forseti hringir.) henni og okkur öllum til mikilla heilla.