umhverfis- og auðlindaskattur.
Frú forseti. Ég tek efnislega undir frávísunartillögu hv. þm. Þórs Saaris, ég var reyndar sjálfur með frávísunartillögu en í ljósi þess að minnihlutaálit mitt hefur hærra númer kemur þessi frávísunartillaga til afgreiðslu.
Hv. þm. Ögmundur Jónasson kom upp með útkrotað blað og benti á hversu margir gestir hefðu komið á fundi nefndarinnar. (Gripið fram í.) Ég efast um að hv. þm. Ögmundur Jónasson hafi verið að hlusta á þá umsagnaraðila sem gagnrýna frumvarpið harðlega og ekki síst vinnulagið.
Hér er verið að festa í lög skattahækkanir, sérstaklega á landsbyggðina, samgönguskatt á landsbyggðina með því að hækka bensínið enn eina ferðina. Hafa ríkisstjórnarflokkarnir ekki verið að tala fyrir því að lækka flutningskostnað? Hér er verið að fara í þá átt að hækka flutningskostnað í vanbúnu máli sem á að vísa aftur til föðurhúsanna. Það þarf að vinna málið miklu betur, frú forseti, og ég styð þessa frávísunartillögu.