fjárlög 2016.
Virðulegi forseti. Ég þakka hv. þm. Lilju Rafneyju Magnúsdóttur fyrir ræðuna. Það var eins og við var að búast, ræða hennar einkenndist af sundrungarmálflutningi eins og ræðurnar sem voru haldnar í gær og fyrradag í þessu máli frá þingmönnum fyrrverandi ríkisstjórnarflokkanna. Ég vil benda á það að nú er búið að vera í gangi mikið málþóf hjá þessum aðilum. Ég ætla fyrst að drepa á það sem þingmaðurinn sagði í lok ræðu sinnar um orkukostnað heimila í landinu. Ég minni á að þingmaðurinn tilheyrir flokki sem vill herða enn frekar á orkuskatti og hefur það sem tillögu í þessari umræðu að hækka enn frekar skattheimtu á orku. Það er eins og það er.
Þingmaðurinn fór í byrjun mörgum orðum um RÚV. Ég vil nota tækifærið hér og geta þess að það er meinleg villa á bls. 10 í nefndaráliti meiri hlutans. Ég bað starfsmenn fjárlaganefndar í gær um að nefndarálitið yrði prentað upp. Fer ég jafnframt fram á það að 1. minni hluti sem er líka með nefndarálit, undir forustu hv. þm. Oddnýjar Harðardóttur, láti prenta upp sitt álit því að þar eru meinlegar villur líka um RÚV á bls. 15. Þá er þetta jafnað út. Ég er talsmaður góðrar lagasetningar og það vita allir að nefndarálit eru lögskýringargögn og þar með er þetta leiðrétt.
Ég vil spyrja þingmanninn: Hvað kemur RÚV til með að hafa miklar tekjur (Forseti hringir.) á ári verði tillaga sem þingmaður fór yfir í upphafi að veruleika, að útvarpsgjald haldi sér á milli ára, en lækki ekki?