Grunnskólar.
Herra forseti. Ég hvet hv. þingmann til þess að kynna sér niðurstöðu stjórnar Sambands íslenskra sveitarfélaga. Það kemur skýrt fram hjá formanni Sambands íslenskra sveitarfélaga og fleiri sem eru á sömu skoðun og hann að þetta komi ekki til með að skerða sjálfsákvörðunarrétt sveitarfélaga.
Ég spyr bara: Eru sveitarfélög á öðrum Norðurlöndum með svakalega takmarkað vald í þessum efnum? Að sjálfsögðu ekki. Af hverju þora menn ekki að viðurkenna og tryggja réttarstöðu sjálfstætt rekinna skóla? Af hverju þora menn ekki að takast á við þá pólitísku spurningu? Menn gætu sagt: Við viljum að sjálfsögðu styrkja réttarstöðu þessara skóla því að það er í þágu nemenda, foreldra, í þágu fjölskyldna og skólasamfélagsins. Við fáum fjölbreytni í skólasamfélagið og ógnum ekki jöfnum tækifærum til náms. Við aukum fjölbreytnina.
Ég hvet hv. þingmann, sem alla jafna er nokkuð framsýnn, að ganga til liðs við mig í þessu mikilvæga máli.