upptaka samræmdrar vísitölu neysluverðs.

Hæstv. forseti. Ég þakka hv. þm. Þorsteini Sæmundssyni ræðuna. Ég get alla vega sagt að mín tilfinning undir þessari ræðu var sú að hv. þingmaður væri ekki alveg alls kostar sáttur í eigin skinni eða hjarta og ég var hugsi vegna þess að ég veit hug hans til þessara mála, vísitalna og verðtryggingar. Eins og hv. þingmaður kom inn á í sinni ræðu var þetta mál fyrst flutt hér á Alþingi 2016 og þá var hv. þm. Þorsteinn Sæmundsson einn af flutningsmönnum ásamt hv. þm. Elsu Láru Arnardóttur, Ásmundi Einari Daðasyni og Silju Dögg Gunnarsdóttur.

Svo heyri ég yfirlýsingar hér í ræðu hv. þingmanns að metnaðurinn sé enginn, þetta sé metnaðarlaust mál o.s.frv. Ég átta mig ekki alveg á þessum málflutningi þar sem hv. þingmaður var einn af þeim sem töluðu harðast allt kjörtímabilið 2013–2016 um þessi mál og var hvatamaður og mjög umhugað um að fara í það sem kallað er að afnema verðtryggingu.

Ég spyr hv. þingmann: Hvað hefur breyst í afstöðu hv. þingmanns til þessa máls? Hér ætlum við að fara í faglega vinnu við að meta kosti og galla þess að breyta vísitölugrundvelli mögulega í lánskjarasamningum í samræmi við þau lög sem um það fjalla, sem ég tel (Forseti hringir.) afar mikilvægt. Hvað hefur breyst í afstöðu hv. þingmanns gagnvart þessu máli?