aðkoma ríkisins að kjarasamningum.
Virðulegi forseti. Ég geri mér grein fyrir því að hæstv. forsætisráðherra semur kannski ekki beint við samtök opinberra starfsmanna eða við Alþýðusambandið fyrir hönd þeirra starfsmanna sem í því eru og vinna hjá ríkinu. En forsætisráðherra markar auðvitað stefnu og hann gaf upp tiltekinn bolta í áramótaávarpinu.
Ég skildi hæstv. forsætisráðherra þannig hér áðan að hann væri að gagnrýna þær áherslur sem hefðu verið í kjarasamningum fyrir jól og vildi að lægstu laun hefðu verið hækkuð meira. Ég vildi gjarnan fá staðfestingu hæstv. forsætisráðherra á því.
Þá hljótum við, vegna þess að fjármálaráðherra semur við starfsmenn ríkisins, að búast við því að þessari almennu stefnumörkun forsætisráðherra, um áherslu á hækkun lægstu launa, fylgi tilboð til viðsemjenda um sérstakar hækkanir sem nýtast hinum lægst launuðu umfram aðra.