eftirlaun forseta Íslands, ráðherra, alþingismanna og hæstaréttardómara.
Hæstv. forseti. Ég veit að þetta er ákaflega viðkvæmt mál hjá hv. þm. Steingrími J. Sigfússyni. En við skulum segja að þetta sé rétt, að það hafi orðið breyting á því frumvarpi frá því að samkomulagið var gert á milli formanna stjórnmálaflokkanna og þar til að það var flutt hér á Alþingi. En mér finnst mjög ólíklegt að þegar að forsætisnefndarfulltrúi Vinstri grænna flutti málið og skrifaði upp á það að ekki hafi legið algerlega fyrir hvernig þetta mál var vaxið.
Ég get ekki ímyndað mér annað en að frumvarpið hafi verið rætt í þingflokki Vinstri grænna. Varla hefur hv. þm. Þuríður Backman farið að flytja málið án þess að það hafi verið rætt í þingflokknum. Það hlýtur að hafa verið öllum ljóst hvernig málið var vaxið og hvernig frumvarpið leit út þegar það barst inn á hv. Alþingi. Ég fullyrði að forsætisnefndarfulltrúinn hefur verið búinn að skoða málið áður en það var flutt. Vissi þá formaður flokksins ekkert um hvernig málið var fyrst fulltrúinn í forsætisnefndinni vissi það?