Framhaldsskóli við utanverðan Eyjafjörð.
Frú forseti. Við ræðum um tillögu til þingsályktunar um stofnun framhaldsskóla við utanverðan Eyjafjörð. Ég er stoltur yfir því að vera einn flutningsmanna tillögunnar. Eins og kom fram í máli hv. þm. Birkis Jóns Jónssonar er þetta hið besta mál og hefði mátt ganga hraðar, eins og hv. þm. Össur Skarphéðinsson kom inn á áðan, en það er eins og það sé einhver tregða í menntamálaráðuneytinu.
Það er hárrétt að menntamálaráðherra hefur skipað nefnd til að kanna þessi mál. Það kemur fram í greinargerðinni að öll rök hníga að því að stofnaður verði sjálfstæður framhaldsskóli á svæðinu, við utanverðan Eyjafjörð. Það þarf ekki að kanna það í mörg ár í viðbót heldur þarf að hefjast handa, því fyrr því betra. Ég legg áherslu á að það er mikilvægt að þetta verði sjálfstæður skóli. Það hefur einmitt verið rætt um að þetta yrði útibú Verkmenntaskólans á Akureyri eða Menntaskólans á Akureyri. Ég held að það sé langheillavænlegast að þetta sé sjálfstæður skóli með starfsstöð á svæðinu. Mér finnst auðvitað eðlilegast að hún verði miðsvæðis og þá staðsett á Ólafsfirði. Það yrði í framtíðinni stutt frá Siglufirði og stutt frá Dalvík.
Ég þekki nokkur dæmi þess að fjölskyldur hafi flutt frá Ólafsfirði til Akureyrar þegar börnin komust á framhaldsskólaaldur. Það getur gerst hjá fjölskyldu að jafnvel þrír nemendur fari á sama tíma í framhaldsskóla. Það er ærinn kostnaður fyrir eina fjölskyldu ,að senda þrjú börn í framhaldsskóla. Þau eru fjarri foreldrahúsum á meðan og þurfa að leigja sér íbúð eða vera á heimavist, greiða mötuneytisgjald og allt sem því fylgir. Það getur verið heilmikill baggi á einni fjölskyldu. Við vitum að fátt styrkir byggðirnar meira en að fólkið á svæðinu geti stundað nám, grunnnám og framhaldsnám, á svæðinu.
Við höfum dæmi um slíka framlengingu á námsframboði með háskólanáminu á Akureyri. Hvílík gífurleg lyftistöng það hefur verið á Akureyri og allt svæðið, allan Eyjafjörð. Það teygir sig jafnvel lengra og er afar mikilvæg vítamínsprauta. Oft hefur verið talað um það að Háskólinn á Akureyri sé stóriðja svæðisins.
Ég hef einmitt líka lagt áherslu á það í þingsal að stofna beri háskóla á Ísafirði og á Egilsstöðum, ekki aðeins háskólasetur heldur fullbúna háskóla. Það mun sýna sig að þeir skólar vaxa og dafna líkt og Háskólinn á Akureyri sem annar ekki eftirspurn. Hins vegar er tregða hjá menntamálaráðuneyti, hæstv. menntamálaráðherra og einnig hæstv. fjármálaráðherra, til að styðja almennilega við þetta nám. Síðast í morgun efndu nemendur Háskólans á Akureyri til fundar til að mótmæla sinnuleysi stjórnvalda og niðurskurði. Mótmælin beindust ekki aðeins gegn ríkisstjórninni heldur einnig meiri hluta í bæjarstjórn Akureyrar sem er duglaus í því að verja Háskólann á Akureyri.
Það er mikill og víðtækur stuðningur á Eyjafjarðarsvæðinu við stofnun framhaldsskóla. Ég legg áherslu á að þetta verði skóli með fullbúið nám, fjögurra ára nám til stúdentsprófs og að drifið verði í að koma þessum skóla upp. Það yrði ríkisrekinn skóli eins og langflestir framhaldsskólar í landinu og það er afar mikilvægt. Þetta er ein besta byggðastefnan sem við getum séð fyrir okkur. Við höldum fjölskyldum og fólkinu lengur, sköpum störf á svæðinu og nemendur koma ferskir út á vinnumarkaðinn, sem hefur margfeldisáhrif á atvinnulífið. Öll þjónusta í kringum svona stofnun er yfirleitt vanmetin. Ég held að það liggi á þessu máli og vona að menntamálanefnd Alþingis drífi í að koma því áfram svo að hægt verði að afgreiða þessa þingsályktunartillögu á vorþingi og að við megum sjá, jafnvel á næsta ári, stofnun framhaldsskóla við utanverðan Eyjafjörð.