umsókn Íslands um aðild að Evrópusambandinu dregin til baka.

Virðulegi forseti. Ég tek undir þessi orð hv. þm. Helga Hjörvars vegna þess að hér hefur aldeilis verið gefinn fyrirvari. Við fengum ekki mikinn fyrirvara á þessum kvöldfundi en ráðherrarnir hafa heldur betur fengið fyrirvara á því hvenær hefur verið óskað eftir því að þeir sitji hér og eigi orðastað við okkur þingmenn í salnum. Ég vil fá að heyra frá hæstv. forseta hvort það sé ekki alveg öruggt að á meðan ræða þingflokksformanns Vinstri hreyfingarinnar – græns framboðs verður flutt og að á meðan hv. þm. Árni Páll Árnason, formaður Samfylkingarinnar, flytur sína ræðu verði ráðherrar í salnum sem geti hlýtt á mál hans og brugðist við því sem hann spyr og segir.

Nú er búið að koma með alls konar skilaboð til okkar inn í þessa umræðu frá forustumönnum í ríkisstjórn en það er samt ekki hönd á neitt festandi. Þeir þurfa að fara að koma hingað og eiga við okkur (Forseti hringir.) alvöruorðastað um hvað þeir meini og hvernig þeir ætli að vinna með þetta mál í framhaldinu.