umsókn Íslands um aðild að Evrópusambandinu dregin til baka.
Virðulegi forseti. Ég vildi spyrja hæstv. forseta hvort ekki væri hægt að endurtaka atkvæðagreiðslu um lengd þingfundar þar sem staðreyndin er sú að þegar hingað er komið á fundinum hafa stjórnarflokkarnir ekki lengur meiri hluta á þingfundinum. Þriðjungur þeirra þingmanna sem hér ákváðu kvöldfund eru farnir af fundinum. (Gripið fram í: Þeir eru í húsi.) Nei, það eru aðeins 28 þingmenn í húsi. Trúlega er þingheimur ekki einu sinni ályktunarfær á þessari stundu. Þetta er auðvitað algerlega óviðunandi ástand þegar verið er að ræða það stóra álitamál sem uppi er. Sérstaklega er sárt að sjá ekki í húsi aðra ráðherra en Bjarna Benediktsson, sem við bíðum spennt eftir að sjá á mælendaskrá líka. En að hæstv. ráðherrar Illugi Gunnarsson, Ragnheiður Elín Árnadóttir, Hanna Birna Kristjánsdóttir og Kristján Þór Júlíusson skuli ekki vera komin hingað til fundarins kallar náttúrlega á það að við verðum í ræðustólnum að kalla á þá þar til þeir koma.
