Vestfirðir sem vettvangur kennslu í sjávarútvegsfræðum o.fl.

Frú forseti. Ég fagna jákvæðum viðbrögðum hæstv. sjávarútvegsráðherra við þessari þingsályktunartillögu og þykist vita að við munum eiga hauk í horni, flutningsmenn tillögunnar, varðandi framhald málsins því að eins og hæstv. ráðherra kom inn á er nú þegar til staðar í umhverfinu fyrir vestan rannsókna- og þekkingarvettvangur sem hefur verið að þróast á undanförnum árum. Annars vegar að frumkvæði og tilstuðlan háskólanna og rannsóknastofnana, hins vegar að frumkvæði og tilstuðlan sjávarútvegsfyrirtækjanna og það er einmitt óskastaðan þegar þessi samþætting getur orðið.