fjárlög 2018.
Virðulegi forseti. Ég skal vera sammála því að lög um opinber fjármál hafi að vissu leyti sannað gildi sitt út af aðstæðum, aðallega að því marki að allir gallarnir á þeim hafa opinberast og ekki hefur verið gert ráð fyrir afbrigðilegu ferli eins og við höfum lent í varðandi kosningar og svoleiðis. En þau hafa sannað gildi sitt á þann hátt að allir sem eru í umræðunni virðast vera mjög vel á nótunum varðandi það hvernig þetta ætti að vera t.d. í tengslum við fjáraukalögin, hvað við gerum rangt þar vegna aðstæðna. Ég hlakka til að fara í eðlilegt fjárlagaferli þar sem maður getur rakið það hvernig stefnumótunin kemur inn í fjárlögin.
Eitt atriðið fannst mér vanta og það er stefnumótun þingsins, hvernig hún nær inn í fjármálaáætlunina. Ríkisstjórnin kemur þar og skilar inn stefnum sínum, en Alþingi hefur væntanlega einhvers konar aðkomu eða breytingarmöguleika á því hvernig stefnan er þar fram sett. Ég er ekki viss um að gert sé ráð fyrir breytingartillögum sem ganga þar. Það væri áhugavert að heyra skoðanir hv. formanns fjárlaganefndar á því í framhaldi af því að við tökum fjármálaáætlunina næst, sem hefur náttúrlega áhrif á fjárlögin. Ég minni á kynningu ráðuneyta í upphafi næsta árs, alla vega það, og gestina sem koma ítrekað fyrir nefndina.