Afnám laga um Tækniháskóla Íslands.

Virðulegi forseti. Hv. þingmaður hefur ekki alveg hlustað nógu vel þegar ég var að tala áðan. Ég var að segja að þessi form væru bæði ágæt, bæði sjálfseignarstofnunarformið og ehf-formið. Það var mat þessara aðila að ehf-formið hentaði þeim betur og að þeir bæru meiri ábyrgð, eins og rektorinn segir í umsögn sinni. Það er möguleiki, bæði er hægt að bæta við nýjum hluthöfum og þeir bera meiri ábyrgð á rekstrinum en með sjálfseignarstofnunarforminu sem kannski enginn ber ábyrgð á og er munaðarlaust. Ég er alls ekki á móti því og tel það hið allra besta mál. Ég tel hitt þó jafngott ef ekki betra, ehf-formið. Mér finnst afstaða flokks hv. þingmanns, á móti þessu frumvarpi, alveg með ólíkindum, bara af því að það er ehf í staðinn fyrir sjálfseignarstofnunarform. Eins og ég segi, gamla Alþýðubandalagið ræður för hjá þeim.