Marco Polo áætlun Evrópusambandsins.
Eitt af því sem hæstv. ráðherra sagði var að áætlunin gæti haft þýðingu og að menn hafi komist að þeirri niðurstöðu að ekki væri nóg að fá styrk í þrjú ár.
Ef flutningarnar eru styrktir í Noregi er full ástæða til þess að menn fari yfir málin aftur, hvort þetta gæti ekki gengið hér líka. Hæstv. samgönguráðherra er alltaf að burðast með þetta lík í lestinni að samgönguráðherrann á Íslandi lagði niður sjóflutninga og menn hugsuðu ekki fram í tímann. Uppi stöndum við með það að vegirnir eru að sligast undan þessum gríðarlegu þungaflutningum og hæstv. ráðherra reynir að bjarga sér á því að menn séu að heimta hærri skatta til að koma í veg fyrir þetta. Það er ekki þannig. Allir vilja auðvitað að vegir landsins séu betri og þoli flutningana sem á þá þarf að leggja en það er engin ástæða til þess að flytja allar vörur eftir vegunum. Full ástæða er til að styðja við bakið á þeim aðilum sem mundu vilja flytja vörur á sjó. Hægt er að gera það með ýmsum leiðum (Forseti hringir.) og ég hvet til þess að menn skoði þær betur.