skóli án aðgreiningar.

Virðulegur forseti. Íslenska menntakerfið starfar eftir hugmyndafræðinni um menntun án aðgreiningar eða menntun fyrir alla. Eins og hv. þingmenn gera sér grein fyrir var sú stefna lögfest hér á landi og að mínu mati er hún vel framkvæmanleg. Það er mjög brýnt að við hlúum að öllum börnum og veitum jöfn tækifæri. Við vitum að við þurfum að fara í meiri stuðning fyrr í skólakerfinu og þess vegna hefur sú vinna sem við höfum verið að vinna síðustu misseri falist í að einblína á að grípa börnin fyrr og efla alla umgjörð í kringum kennara. Hvernig hefur okkur miðað áfram? Okkur hefur miðað býsna vel vegna þess að eitt af því sem við sjáum er að íslenskum börnum líður mjög vel í skólakerfinu. Það skilur okkur til að mynda að frá mörgum öðrum menntakerfum, að börnunum okkar líður vel. Ég er nefnilega þeirrar skoðunar að ef barni líður vel þá aukum við líkurnar á því að barnið finni sig og að það velji sér nám við hæfi og hafi sjálfstraust til þess. Þannig að ég tel að við séum á réttri leið þegar við segjum að við viljum menntun fyrir alla og við séum ekki með aðgreiningar hvað það varðar. Við þurfum hins vegar alltaf að hafa möguleikann á því að leita að þeirri sérkennslu sem er við hæfi og hlúa endalaust að menntakerfinu vegna þess að það er þannig að þeim þjóðum sem fjárfesta í menntun mun vegna betur. Ég held líka að á þessum Covid-tímum sé það besta sem við gerum að fjárfesta í menntakerfinu.