Frumvarp um vatnatilskipun ESB.
Hæstv. forseti. Ég vil taka undir með hv. þm. Guðjóni A. Kristjánssyni og mælast til þess að hæstv. forseti beiti sér fyrir því að þessum fundi ljúki þegar í stað, í það minnsta verði gert á honum hlé og menn ræði málin. Þingfundurinn er haldinn þvert á vilja stjórnarandstöðunnar og reyndar gegn mjög eindregnum mótmælum hennar. Þau mótmæli komu fram í gær þegar ákveðið var að boða til fundarins. Stjórnarandstaðan vill að við höldum okkur við starfsáætlun þingsins. Það var ekki gert ráð fyrir þingfundi í dag, hvað þá á morgun. Þetta kom einnig fram í upphafi vikunnar þegar vinnuáætlun var lögð fyrir þingflokksformenn.
Ég geri mér fyllilega grein fyrir því að samkvæmt þingskapalögum er það á valdi hæstv. forseta þingsins að ákveða um þinghaldið. Engu að síður vil ég ítreka, og aftur taka undir með hv. þm. Guðjóni A. Kristjánssyni, að þingið verður ekki rekið í ósætti við stjórnarandstöðuna. Ég lýsi fullri ábyrgð á hendur ríkisstjórninni sem setur þinghaldið í fullkomið uppnám með óbilgirni sinni.