viðbrögð við uppgangi skipulagðrar glæpastarfsemi.

Herra forseti. Miðflokkurinn hefur lagt fram beiðni um skýrslu frá hæstv. dómsmálaráðherra sem við teljum mjög mikilvæga og tímabæra. Greiningardeild ríkislögreglustjóra hefur í mörgum skýrslum í fjöldamörg ár bent á þá hættu að uppgangur skipulagðrar glæpastarfsemi sé að aukast á Íslandi. Í skýrslum greiningardeildar eru talin upp ýmis atriði sem þarf að bæta í löggæslunni og hjá lögreglunni. Við óskum eftir því í þessari skýrslubeiðni, í liðum a–g, að dómsmálaráðherra geri grein fyrir því hvað hafi verið tekið til bragðs eða hvað hæstv. dómsmálaráðherra hyggist taka til bragðs til að koma til móts við ábendingar greiningardeildar.