tilfærsla verkefna frá Umhverfisstofnun til Heilbrigðiseftirlits Austurlands.

Virðulegi forseti. Ég vil þakka þessa umræðu og taka undir með þeim hv. þingmönnum sem hér hafa talað og þakka hæstv. ráðherra fyrir svör hennar. Ég vil ítreka í þessu sérstaka tilviki með Heilbrigðiseftirlit Austurlands að þetta er átta ára ferli. Heilbrigðiseftirlit Austurlands hefur í átta ár staðið í bréfaskriftum við umhverfisráðuneytið og Umhverfisstofnun og óskað eftir því að fá frekara framsal á verkefnum en hefur í raun og veru engin svör fengið önnur en þau að samningnum við það var sagt upp fyrir stuttu síðan.

Ég verð að viðurkenna að ég skil ekki alveg hvað er í gangi. Ég vil taka fram að mér finnst að faglegar forsendur eigi að vera í heiðri hafðar og að sjálfsögðu á að taka fullt tillit til þeirra en ríkisstjórnin okkar vill einfaldara Ísland. Hún vill selja beint frá býli, hún vill styrkja sveitarstjórnarstigið, hún vill efla atvinnu á landsbyggðinni og í takti við þær yfirlýsingar hljótum við að skoða þetta mál með virkilega jákvæðum hætti. Átta ára fyrirspurnum (Forseti hringir.) Heilbrigðiseftirlits Austurlands þarf að svara núna.