alþjóðleg þróunarsamvinna Íslands o.fl.
Virðulegi forseti. Ég þakka hv. þingmanni andsvarið. Ég vil bara segja það að ég hef ítrekað lýst eftir sjónarmiðum hv. þingmanna Framsóknarflokksins og Sjálfstæðisflokksins. Hér var nú að ganga í salinn hv. þingflokksformaður Framsóknarflokksins. Ég sakna þess að enginn hv. þingmaður hafi séð ástæðu til að tjá sig í þessu máli. Mér er algjörlega ómögulegt að skilja það. Ég sagði það í gær að ég gæti svo sem ekki plantað ástríðufræjum í hjörtu þessara þingmanna, ef þeir hafa engan áhuga á málinu þá er það að sjálfsögðu handan minnar getu að gera það áhugavert í þeirra huga. Ég hefði hins vegar talið að það væri hluti af eðlilegum samskiptum í þinginu að þingmenn ólíkra flokka skiptust á skoðunum í þingsal. Mér finnst þetta algjörlega ótrúlegt, sérstaklega af því að meiri hlutinn á sex fulltrúa í nefndinni og ég hef séð þá hér, ég hef séð þá við umræðuna og hv. formaður utanríkismálanefndar hefur verið hér og hlýtt á okkur. Mér finnst því mjög skrýtið að hafa ekki fengið að hlýða á sjónarmið þeirra. Kannski eiga þeir bara eftir að móta sér skoðun og hlusta á meðan á okkur af mikilli andakt.
Hvað varðar vinnuna í utanríkismálanefnd þá hef ég setið í henni eingöngu frá síðasta hausti og get ekkert kvartað yfir starfsaðferðum nefndarinnar þannig að ég treysti á að menn verði málglaðari þegar á nefndarfund er komið og reiðubúnir að vinna að málinu eins vel og hægt er. Ég ætla bara að treysta því að þannig verði það þangað til annað kemur í ljós. En ég lýsi miklum vonbrigðum með að engir hv. þingmenn, hvorki í utanríkismálanefnd né öðrum nefndum, hafi tjáð sig um þetta mál. Maður hefði haldið að hv. þingmenn úr öllum nefndum þingsins hefðu áhuga á þessu gríðarstóra máli þar sem við afgreiddum á síðasta kjörtímabili aðgerðaáætlun um þróunarsamvinnu sem allir voru sammála um nema einn þingmaður, (Forseti hringir.) en enginn hefur áhuga á að tjá sig um þessi mál hér.