þjóðaratkvæðagreiðsla um framhald viðræðna um aðild Íslands að Evrópusambandinu.
Hæstv. forseti. Ef við rifjum upp meginþætti varðandi sjávarútvegsmálin sem ljóst var að gætu valdið erfiðleikum þá er fyrir utan fjárfestingarnar verið að tala um samningsforræði vegna deilistofna, samningsforræði á alþjóðavísu sem Evrópusambandið hefur samkvæmt grundvallarreglum sínum á sínu forræði, ekki einstakra aðildarríkja, og hins vegar stjórn í fiskveiðilögsögunni, og áhugavert ef hv. þingmaður telur að þessi atriði hefðu ekki verið fyrirstaða.
Ég velti til dæmis fyrir mér í þessu sambandi samningsforræði varðandi deilistofna, hvort það hefði að mati hv. þingmanns verið umsemjanlegt af Íslands hálfu eða hvort hann telji líklegt að Evrópusambandið hefði undir einhverjum kringumstæðum fallist á að falla frá sínu samningsforræði fyrir hönd Evrópusambandsríkja í málefnum af því tagi.