bið eftir þjónustu transteyma.

Hæstv. forseti. Ég ítreka þakkir fyrir þessa fyrirspurn. Talandi um bið, og bið eftir bið, þá erum við líka búin að bíða allt of lengi með þessa góðu fyrirspurn. Það er mikil þörf á því að halda þessu gangandi hér í þingsal. Hv. þingmaður leggur til að ég eigi í góðu samstarfi við Samtökin — það er líka allt of langt síðan ég hitti þau síðast og það er nú einhvern veginn veruleikinn í þessu. En það er rétt, að við þurfum að halda þessu við. Ég hef aðeins rætt þetta við spítalann og við erum að horfa til heilsugæslunnar í stuðningi við að draga úr bið eftir biðlista og förum svo í biðlistann sjálfan. En heilsugæslan gegnir veigamiklu hlutverki þegar kemur að heildrænni þjónustu og sálfræðimeðferð og við þurfum einhvern veginn að nota allt kerfið okkar. Ef þörf er á meiri eða sérhæfðari geðheilbrigðisþjónustu þá þurfum við á einhvern hátt að horfa til allra úrræða. Þetta er hins vegar verkefni sem hefur einhvern veginn kjarnast — ég tek undir það sem hv. þingmenn Hanna Katrín Friðriksson og Steinunn Þóra Árnadóttir komu inn á varðandi lögin — mjög vel í stuðningnum við fólk til að leita sér þjónustu. Það er auðvitað jákvæðast í þessu og því eigum við að horfa afmarkað á þetta, ræða við hlutaðeigandi aðila og reyna að leggja líka sérstaka áherslu á að vinna niður þennan biðlista. Hann slær mann vægast sagt mjög illa og ég heiti því hér og nú að gera það sem í mínu valdi stendur til þess. Ég þakka að öðru leyti fyrir þessa góðu umræðu.