Störf þingsins.

Virðulegur forseti. Stríðsátök eru mannanna verk og öllum stríðsátökum lyktir með samningum um síðir. Tíminn sem það tekur að ná téðum samningum er þó alltaf óbærilega langur, sama hvernig á það er litið. Það er eins og mannskepnan geti hvorki lært af mistökum sínum né lagt upp með að hefja ekki átök þegar ágreiningur vaknar, ágreiningur sem víða í heiminum leiðir til svo mikilla hörmunga að orð fá ekki lýst. Eftir því sem ég kemst næst standa yfir stríðsátök á ríflega 50 stöðum í heiminum í dag.

Í dag berast jafnframt jákvæðar fréttir af viðræðum um vopnahlé á Gaza í Palestínu, fréttir sem við öll í þessum sal höfum vonast eftir að heyra frá því að við samþykktum þingsályktun í nóvember síðastliðnum um að án tafar skuli komið á vopnahléi af mannúðarástæðum á Gaza-svæðinu svo tryggja megi tafarlaust öryggi almennra borgara, aðgengi hjálpar- og mannúðarsamtaka og að neyðarvistum og læknisaðstoð. Ég vona innilega, virðulegi forseti, að lendingin í þessum viðræðum verði varanlegt vopnahlé, og þótt fyrr hefði verið. Sú neyð sem almennir borgarar á Gaza búa við og blasir við heiminum öllum knýr fulltrúa alþjóðastofnana til að kveða enn fastar að orði. Samkvæmt Sameinuðu þjóðunum þjáist helmingur íbúa á Gaza af miklu hungri sem eðli málsins samkvæmt skapast af mikilli óvissu um aðgengi að fæði. Haft er eftir mannréttindastjóra Sameinuðu þjóðanna að hindranir ísraelskra stjórnvalda á því að neyðaraðstoð berist íbúunum á Gaza jaðri við að stjórnvöld noti svelti sem vopn í stríði. Það sé stríðsglæpur. Þetta er ekkert annað en skipulagt svelti, virðulegi forseti, og það er mannanna verk.