störf þingsins.
Forseti. Formaður menntamálanefndar Alþingis, hv. þm. Sigurður Kári Kristjánsson, hefur sagt í fjölmiðlum að það sé aðeins tímaspursmál hvenær opinberum háskólum verði veitt heimild til að innheimta skólagjöld. Orðrétt er haft eftir formanni nefndarinnar í Fréttablaðinu þann 13. apríl sl., með leyfi forseta:
„Stjórnarflokkarnir verða að taka afstöðu til þess og mér hefur fundist þetta sjónarmið njóta sífellt meiri stuðnings í samstarfsflokknum.“
Formaður menntamálanefndar er auðvitað að segja að þessi mál séu til umræðu innan stjórnarflokkanna og að innan Samfylkingarinnar sé vaxandi stuðningur við það að taka upp skólagjöld í opinberum háskólum. Hv. þm. og varaformaður menntamálanefndar, Einar Már Sigurðarson, segir í sama blaði vegna orða formanns nefndarinnar, með leyfi forseta:
„Það verkefni sem bíður okkar er að svara þeirri spurningu hvernig við getum jafnað samkeppnisstöðu háskólanna svo allir sitji við sama borð.“
Og síðar, með leyfi forseta:
„Ég hef þó ekki þá mælistiku að geta kastað reiður á það hvort sífellt meiri stuðningur sé um þessar hugmyndir eins og Sigurður segir í mínum flokki.“
Með öðrum orðum getur hv. varaformaður menntamálanefndar ekki áttað sig á því hvort um aukinn stuðning sé að ræða í hans eigin flokki um upptöku skólagjalda í opinberum háskólum.
Ég vil því beina orðum mínum til hv. þingmanns og varaformanns menntamálanefndar, Einars Más Sigurðarsonar, og spyr hver afstaða Samfylkingarinnar er varðandi upptöku skólagjalda í opinberum háskólum. Er varaformaður menntamálanefndar sammála því áliti formanns nefndarinnar að það sé aðeins tímaspursmál hvenær heimilt verður að taka upp slík gjöld? Mun Samfylkingin ljá máls á því að opinberum háskólum verði veitt heimild til að innheimta skólagjöld og eru þau mál nú til umræðu innan stjórnarflokkanna (Forseti hringir.) eins og formaður menntamálanefndar segir vera?