heimahjúkrun og ummönnunarbyrði.
Virðulegur forseti. Það standa yfir núna samningar við sjúkraþjálfara af því að hv. þingmaður spyr um það m.a., reyndar spurði hann um nánast allt milli himins og jarðar í sinni síðari spurningu. En ég ætla að staldra sérstaklega við það að verið er að vinna að samningi við sjúkraþjálfara og vonandi klárast það bara núna á næstu vikum. Hv. þingmaður spyr sérstaklega líka um rekstrarkostnað hjúkrunarheimila og þá umræðu sem þar hefur verið. Komið hefur fram í fjölmiðlum að verkefnastjórnin sem ég skipaði til að greina þennan rekstrarkostnað hefur skilað sinni vinnu og greiningin byggist einkum á svörum rekstraraðila. En það eru nokkrar spurningar sem er ósvarað og verið er að fara í saumana á í samstarfi við rekstraraðila. Ég tel að það sé afar mikilvægt að þetta skref hafi verið stigið vegna þess að mitt mat er að það er óásættanlegt að togast stöðugt á um forsendur í umræðu sem er svona mikilvæg eins og þessi umræða er. Við þurfum að ná að stilla saman strengi í ljósi þess hversu mikilvæg þjónustan er og ekki síst til framtíðar með breyttri aldurssamsetningu þjóðarinnar.