Stofnun hlutafélags um Rafmagnsveitur ríkisins.
Virðulegi forseti. Ég tók eftir því að ekki einu sinni heldur tvisvar sagði hv. þm. Birkir Jón Jónsson að það væri stefna Framsóknarflokksins að selja ekki meirihlutaeign ríkisins í Rarik og Landsvirkjun þá væntanlega líka.
Spurningin til hv. þingmanns er þessi: Er Framsóknarflokkurinn til í að selja 49,9% í Rafmagnsveitum ríkisins, af því hlutafé sem þar verður til? Það er mikilvægt að fá það fram. Það gæti komið inn fjárfestir sem vildi kaupa 49,9% og vera minni hluti og samkvæmt skilgreiningu framsóknarmanna ætti það að vera í lagi. Sá fjárfestir gæti gert miklu hærri arðsemiskröfur en ríkið gerði ef það ætti 100%. Það gæti leitt til þess, virðulegi forseti, að það þyrfti að hækka orkuverð enn frekar — fræg eru nú skref Framsóknarflokksins í hækkun rafmagns til íbúa í dreifbýli.
Spurning mín er þessi: Er Framsóknarflokkurinn tilbúinn að selja 49,9% í breyttum Rafmagnsveitum ríkisins?