frávik vegna styrkja úr sjóði er fjármagnar aðstoð við umsóknarríki Evrópusambandsins.
Hæstv. forseti. Ég þakka hv. þm. Jóni Bjarnasyni fyrir ágæta ræðu. Það er kunnara en frá þurfi að segja að hv. þm. Jón Bjarnason stóð lengi í stríði innan ríkisstjórnarinnar vegna þessa máls og aðildarumsóknarinnar almennt og segja má að hann hafi goldið fyrir það með ráðherradæmi sínu að hafa staðið í lappirnar í þessum málum.
Ég vildi aðeins, bara af því að við erum að tala hér um IPA-styrkina sérstaklega, biðja hv. þingmann að rifja það upp með mér hvort það sé ekki rétt munað hjá mér að í upphafi hafi verið gert ráð fyrir að einstök ráðuneyti sæktu um styrki fyrir hönd sinna málaflokka eða sinna stofnana, en tekinn hafi verið einhver snúningur á því einhvers staðar á leiðinni, sennilega í kringum jólin 2010/2011, vegna þess að ráðherrum Vinstri grænna, að minnsta kosti sumum hverjum, leið ekki vel með að (Forseti hringir.) fara bónarveginn til Brussel í þessum efnum.