Samantekt um þingmál

Sviðslistalög

199. mál á 141. löggjafarþingi.
Mennta- og menningarmálaráðherra.

Markmið

Að efla íslenskar sviðslistir, kveða á um skipan og fyrirkomulag og búa þeim hagstæð skilyrði.

Helstu breytingar og nýjungar

Lagðar eru til breytingar á ákvæði um Þjóðleikhúsið í þá veru að megináhersla verði lögð á íslensk og erlend leikverk. Einnig eru hlutverk og helstu verkefni Íslenska dansflokksins skilgreind. Gert er ráð fyrir sviðslistaráði sem verði ráðherra og öðrum stjórnvöldum til ráðgjafar um málefni annarrar sviðslistastarfsemi og lagt til að fé verði veitt á fjárlögum til sérstaks sviðslistasjóðs til stuðnings þeirri starfsemi. Einnig er ráðherra heimilt að gera tímabundinn samning um fjárstuðning við óperustarfsemi.

Breytingar á lögum og tengd mál

Verði frumvarpið að lögum falla úr gildi leiklistarlög nr. 138/ 1998 og reglur nr. 14/2002, um starfsemi Íslenska dansflokksins, að undanskildum ákvæðum 5. gr. um starfslok fastráðinna dansara.

  • Endurflutt: Sviðslistalög, 655. mál (mennta- og menningarmálaráðherra) á 140. þingi (30.03.2012)
  • Skylt mál: Sviðslistir, 800. mál (mennta- og menningarmálaráðherra) á 149. þingi (01.04.2019)

Kostnaður og tekjur

Ekki er gert ráð fyrir auknum kostnaði fyrir ríkissjóð.

Umsagnir (helstu atriði)

Margar ítarlegar umsagnir bárust. Bent var á að ákvæði um áhugaleikfélög vantaði og athugasemdir gerðar við að Leikfélag Reykjavíkur, Leikfélag Akureyrar og Íslenska óperan væru ekki nefnd í frumvarpinu. Leikfélag Reykjavíkur taldi óheppilegt að þurfa að sækja fé í sama sjóð og sjálfstæðu leikhúsin. Þjóðleikhúsið lagði til að bætt yrði í frumvarpið heimild til að ráða listamenn tímabundið til allt að fimm ára.
Lagt var til að hlutverk sviðslistaráðs verði einfaldað og skýrt og skilið á milli verkefna þess og sviðslistasjóðs með afgerandi hætti. Einnig var bent á að fagfólk ætti að skipa meiri hluta í stjórnum menningarstofnana.

Afgreiðsla

Frumvarpið var ekki afgreitt úr nefnd.

Aðrar upplýsingar

Löggjöf á Norðurlöndum:

Noregur
Lov om Riksteatret [riksteaterlova]. LOV-1948-12-13-5.

Danmörk
Bekendtgørelse af lov om scenekunst LBK nr 526 af 04/06/2012 .

Finnland
Teater- och orkesterlag 3.8.1992/730.



Síðast breytt 12.04.2013. Tenglar í efni sem ekki er á vef Alþingis geta breyst og eru birtir án ábyrgðar. Unnið af starfsfólki upplýsinga- og rannsóknaþjónustu Alþingis.

Um samantektir

Samantektir um þingmál hafa verið birtar á vef Alþingis síðan á 141. þingi (2012-2013). Markmiðið er að setja fram í stuttu máli greinargóðar upplýsingar um þingmál og að tengja í efni sem gæti skýrt það frekar.

Samantektir eru einkum unnar um stjórnarfrumvörp en upplýsingum um önnur mál er bætt við eftir þörfum. Fylgst er með máli frá því að það kemur fram á þinginu og upplýsingum bætt við eftir því sem fram vindur. Þær eru að mestu fengnar úr texta frumvarps og umsagna, en tengt er í efni á öðrum vefjum eftir því sem tilefni er til. Tenglar í efni sem ekki er á vef Alþingis geta breyst og eru birtir án ábyrgðar. Umfjöllunin á að vera óhlutdræg en ekki er hægt að gera ráð fyrir að hún sé tæmandi. Samantektin er ekki hluti af þinglegri meðferð né formlegum skjölum þingmálsins.

Allar ábendingar og athugasemdir eru vel þegnar og má senda þær á netfangið rannsoknathjonusta@althingi.is.

Ferill málsins

  • Stjórnarfrumvarp
  • 1. umræða
  • Nefndarálit
  • Breytingatillögur
  • 2. umræða
  • Frumvarp eftir 2. umræðu
  • 3. umræða
  • Lög