Samantekt um þingmál

Mennta- og skólaþjónustustofa

956. mál á 153. löggjafarþingi.
Mennta- og barnamálaráðherra.

Markmið

Að stofna Mennta- og skólaþjónustustofu, sem er þjónustu- og þekkingarmiðstöð, og starfar í þágu barna og ungmenna á sviði fræðslu- og menntamála um land allt í samræmi við lög, stefnu stjórnvalda, bestu þekkingu og alþjóðleg viðmið.

Helstu breytingar og nýjungar

Lagt er til að stofnuð verði Mennta- og skólaþjónustustofa, sem tekur við fjölbreyttum þjónustu-, ráðgjafar- og stuðningshlutverkum við menntun og skólaþjónustu á leik-, grunn- og framhaldsskólastigi. Gert er ráð fyrir að Menntamálastofnun verði lögð niður og verkefni hennar færist til Mennta- og skólaþjónustustofu og mennta- og barnamálaráðuneytisins. Í frumvarpinu er lagt til að markaður verði rammi um verkefni nýrrar stofnunar.

Breytingar á lögum og tengd mál

Um er að ræða ný lög og við gildistöku laganna falla úr gildi lög um Menntamálastofnun, nr. 91/2015. Við gildistöku laganna verða jafnframt breytingar á lögum um íslenskan ríkisborgararétt, nr. 100/1952, lögum um fjárhagslegan stuðning við tónlistarskóla, nr. 75/1985, lögum um háskóla, nr. 63/2006, lögum um námsgögn, nr. 71/2007, lögum um leikskóla, nr. 90/2008, lögum um grunnskóla, nr. 91/2008, lögum um framhaldsskóla, nr. 92/2008, lögum um framhaldsfræðslu, nr. 27/2010, lögum um stuðning við útgáfu bóka á íslensku, nr. 130/2018, lögum um lýðskóla, nr. 65/2019, og lögum um menntun, hæfni og ráðningu kennara og skólastjórnenda við leikskóla, grunnskóla og framhaldsskóla, nr. 95/2019.

Kostnaður og tekjur

Ekki er gert ráð fyrir áhrifum á ríkissjóð.

Afgreiðsla

Frumvarpið var ekki afgreitt úr nefnd.


Síðast breytt 10.07.2024. Tenglar í efni sem ekki er á vef Alþingis geta breyst og eru birtir án ábyrgðar. Unnið af starfsfólki upplýsinga- og rannsóknaþjónustu Alþingis.

Um samantektir

Samantektir um þingmál hafa verið birtar á vef Alþingis síðan á 141. þingi (2012-2013). Markmiðið er að setja fram í stuttu máli greinargóðar upplýsingar um þingmál og að tengja í efni sem gæti skýrt það frekar.

Samantektir eru einkum unnar um stjórnarfrumvörp en upplýsingum um önnur mál er bætt við eftir þörfum. Fylgst er með máli frá því að það kemur fram á þinginu og upplýsingum bætt við eftir því sem fram vindur. Þær eru að mestu fengnar úr texta frumvarps og umsagna, en tengt er í efni á öðrum vefjum eftir því sem tilefni er til. Tenglar í efni sem ekki er á vef Alþingis geta breyst og eru birtir án ábyrgðar. Umfjöllunin á að vera óhlutdræg en ekki er hægt að gera ráð fyrir að hún sé tæmandi. Samantektin er ekki hluti af þinglegri meðferð né formlegum skjölum þingmálsins.

Allar ábendingar og athugasemdir eru vel þegnar og má senda þær á netfangið rannsoknathjonusta@althingi.is.

Ferill málsins

  • Stjórnarfrumvarp
  • 1. umræða
  • Breytingartillaga
  • 2. umræða
  • Frumvarp eftir 2. umræðu
  • 3. umræða
  • Lög