[04:29]
Jóhannes Geir Sigurgeirsson (um fundarstjórn) :
Virðulegur forseti. Ég veit ósköp vel að það er ekki ætlast til þess að undir þessum lið fari menn í efnislega umræðu, en ég get þó ekki stillt mig um að benda á það að trú hæstv. viðskrh. á því að ríkissjóður tapi ekki á þessari ábyrgð byggist á því að skilyrði ríkisstjórnarinnar fyrir málinu eru þau að það sé tekið veð af fiski í sjónum, þ.e. þeim laxi sem er í beit, og er svolítið fróðlegt að skoða þetta í samhengi við deilur einstakra ráðherra og umræðu um veðrétt sem hefur verið í þjóðfélaginu á síðustu dögum.