Ferill 352. máls. Aðrar útgáfur af skjalinu: Word Perfect.
1994–95. – 1064 ár frá stofnun Alþingis.
118. löggjafarþing. – 352 . mál.
574. Fyrirspurn
til fjármálaráðherra um úboðsstefnu ríkisins.
Frá Hermanni Níelssyni.
1 . Er að vænta breytinga á útboðsstefnu ríkisins, t.d. á sviði vegagerðar, viðhalds eigna og nýbygginga?
2 . Hver er afstaða ráðherra til „meðaltalsaðferðar“ við útreikning tilboða?
3 . Hvert er mat ráðherrans á afleiðingum útboðsstefnu sem gerir ráð fyrir að taka ávallt lægsta tilboði — jafnvel þótt verktakar segist geta unnið útboðsverk á 50% lægra verði en verkfræðingar í þjónustu ríkisins reikna út að sé kostnaðarverð?
4 . Ætlar ráðherrann að beita sér fyrir því að kannaðar verði afleiðingar af útboðsstefnu ríkisins með tilliti til gjaldþrots fyrirtækja og einstaklinga, ásamt atvinnumissi starfsmanna og tekjutapi ríkisins í framhaldi af því?
Skriflegt svar óskast.
Greinargerð.
„Meðaltalsaðferð“ sem spurt er um í 2. lið og nota má við útreikning tilboða í hvers kyns mannvirkjagerð er þannig:
1 . Hönnuðir mannvirkja reikni ekki kostnaðaráætlanir heldur aðrir aðilar sem til þess hafa fengið opinbert leyfi.
2 . Öll tilboð í verk sem reiknast lægri eða hærri en fyrir fram ákveðið hlutfall af kostnaðaráætlun falli úr útboðinu og komi ekki til greina (dæmi: 20%).
3 . Upphæðir þeirra tilboða sem eftir standa eru lagðar saman ásamt upphæð kostnaðaráætlunar og deilt í með fjölda (bjóðendur og kostnaðaráætlun).
4 . Því tilboði, sem stendur næst þeirri útreiknuðu tölu sem þannig fæst og er lægra, skal tekið.