Jón Kristjánsson:
Herra forseti. Ég þakka hv. fyrirspyrjanda fyrir að hreyfa þörfu máli. Aðstaða til náms skiptir sköpum í byggðaþróun. Á undanförnum árum hefur skilningurinn vaxið á því að jafna þurfi þessa aðstöðu. M.a. voru styrkir á fjárlögum hækkaðir í því skyni um 40% á yfirstandandi ári. Þeir voru hækkaðir lítillega á árinu þar á undan en það verður að halda áfram á sömu braut til frekari jöfnunar.
Ég vil undirstrika að nauðsynlegt er að hlutlæg úttekt fari fram á þessum málum. Ef Hagfræðistofnun háskólans á að gera þetta hef ég út af fyrir sig ekki athugasemdir við það. Þó er nauðsynlegt að hún leiti fanga sem víðast og geri vandaða úttekt á réttindum nemenda sem stunda nám fjarri heimabyggð. Réttindakaflinn í þessu skiptir miklu máli.