Kristín Halldórsdóttir:
Herra forseti. Oft er talað um sögulega atburði í þessum ræðustóli og ekki alltaf af miklu tilefni. En hér er svo sannarlega um sögulegan atburð að ræða því eftir því sem ég hef komist næst í samráði við skrifstofu Alþingis, hafa tillögur um endurskoðun varnarsamningsins við Bandaríkin ekki komið til atkvæða á hv. Alþingi síðan 1956. Það er merkileg staðreynd. Það er merkileg staðreynd að þingmenn sem hafa þó haldið á lofti því viðhorfi að hér skuli ekki vera erlendur her á friðartímum skuli ekki treysta sér til að styðja þá tillögu sem hér er til atkvæða þrátt fyrir gerbreytta heimsmynd og gerbreyttar aðstæður í heimshluta okkar. Það er óskiljanlegt, herra forseti, og ég segi að sjálfsögðu já við tillögunni.