Ásta Möller (andsvar):
Herra forseti. Það er erfitt að ná niðurstöðu í þessu máli. Við erum nú sjálfsagt báðar, ég og hv. þm. Katrín Fjeldsted, að lesa mjög svipuð tímarit í þessum efnum.
Mig langaði að vísa til umsagnar landlæknis til menntmn. og þingsins í fyrra. Þar segir, með leyfi forseta:
,,Rannsóknir greinir hins vegar nokkuð á um alvöru og tíðni heilaáverka. Nýleg rannsókn frá Bandaríkjunum leiddi til dæmis í ljós að einn af hverjum 60 þús. áhugahnefaleikamönnum fékk alvarlega heilaáverka. Sömuleiðis hafa ástralskar rannsóknir leitt í ljós litla áverkatíðni en þó sýnir önnur marktækan mun á fínum taugalífeðlisfræðilegum prófum hjá hnefaleikamönnum.``
Ég hef lesið þessa rannsókn og hún er innan eðlilegra marka, innan skekkjumarka.
,,Aðrar taugalífeðlisfræðilegar rannsóknir, t.d. frá Karólínska sjúkrahúsinu í Svíþjóð hafa leitt svipaðar breytingar í ljós, m.a. með heilaritsrannsóknum. Tvær rannsóknir á áhrifum hnefaleika á taugakerfið frá Bretlandi leiddu hins vegar hvorug í ljós nein vandamál hjá leikmönnum.``
Hér hefur landlæknir greint frá sjö rannsóknum sem staðfesta það sem við höfum haldið fram.