Össur Skarphéðinsson:
Herra forseti. Mig langaði að inna hæstv. menntmrh. eftir því hvort ekki væri búið að leggja einhver drög að því að reyna að koma á aukinni fræðslu fatlaðra í gegnum netið. Er ekki einhvern veginn hægt, herra forseti, að beita sér fyrir því að menntakerfið og almannatyggingakerfið yrðu þættuð saman í þessu máli, e.t.v. með því almannatryggingakerfið legði fötluðum til tölvur og menntakerfið legði þeim til menntun til þess að nýta þær og síðan væri hægt í krafti upplýsingatækninnar að koma á fót miklu öflugra menntakerfi fyrir fatlaða en menn hafa í dag.
Ég hjó eftir því í máli hæstv. ráðherra að mér fannst að hann legði ekki áherslu á þennan möguleika þó hann nefndi að vísu símenntunarstöðvar á landsbyggðinni sem í vaxandi mæli hafa tekið netið í sína þjónustu. En ég held, herra forseti, að framtíðin í menntun fatlaðra fullorðinna einstaklinga hljóti að verulegu leyti að liggja í þessu. Það er alveg ljóst að þetta mun opna miklu fleiri möguleika fyrir þennan hóp til þess að afla sér menntunar.