Frsm. landbn. (Drífa Hjartardóttir) (andsvar):
Herra forseti. Um er að ræða íblöndunarefni t.d. þegar smjöri eða mjólkurafurðum er blandað í þorskflök og þau seld úr landi með fyllingu í. Eins er þetta mjólkurduft eða mjólk sem er notuð í súkkulaði. Er þetta mjög mikilvægt vegna þessarar vöru sem er seld í Fríhöfninni í Keflavík og hefur gert það að verkum að súkkulaði, íslenskt súkkulaði, er selt þar á samkeppnishæfu verði við erlendu vöruna. Þetta eru því þessi iðnaðarhráefni, þ.e. mjólk og smjör, sem eru notuð í þær vörur sem ég tiltók, t.d. til að fullvinna fiskinn í þá einhverjar afurðir og eins í súkkulaðiiðnaði.