Þuríður Backman:
Herra forseti. Ég þakka fyrirspyrjanda fyrir að koma hér með þessa fyrirspurn og vekja athygli á málaflokknum. En fæðing barns er ekki sjúklegt ástand. Það er eðlileg líkamsstarfsemi í flestum tilfellum. Það er sem betur fer undantekning ef leita þarf aðstoðar á hátæknisjúkrahúsi vegna fæðinga í heimahúsum. Því miður hefur þróunin hins vegar orðið sú að langflestar konur fæða orðið á hátæknisjúkrahúsum og þá hér á höfuðborgarsvæðinu.
Ég vil taka fram að til að hægt sé að meta hvort ástæða sé til að senda konu um langan veg utan af landi til að fæða á hátæknisjúkrahúsi þarf öfluga mæðravernd, læknar og ljósmæður þurfa að vera til staðar. Því miður er það ekki alls staðar þannig. Eins og hér var nefnt þá vantar ljósmæður, a.m.k. á Héraði nú um stundir. Því vil ég spyrja hæstv. ráðherra hvort áætlanir séu uppi um að hvetja ljósmæður til að sinna störfum á landsbyggðinni.