Þuríður Backman:
Herra forseti. Ég þakka fyrir þessa fyrirspurn og að vakin sé athygli á þessu máli. Þetta er jafnréttismál. Þetta á við um stöðu kynjanna á vinnumarkaði í dag þar sem horfið var frá miðstýrðum samningum og yfir í dreifstýrða launasamninga og þar sem samningarnir eru bundnir við einstaklinga þá eru ýmsar vísbendingar sem gefa það til kynna að launamunur hafi á mörgum sviðum frekar aukist. Eins má benda á að þetta fyrirkomulag hefur á mörgum vinnustöðum valdið tortryggni meðal samstarfsmanna sem vinna við sömu störf, vita ekki og mega ekki vita hvað nánasti samstarfsmaður hefur í laun og geta raunar ekki með nokkurri vissu vitað hvort um launamun sé að ræða á einum og sama vinnustaðnum fyrir sömu vinnu og það fari jafnvel eftir því hvort viðkomandi er karl eða kona.