Össur Skarphéðinsson:
Frú forseti. Faglegt og fjárhagslegt hagræði sem felst í sameiningu sjúkrahúsanna á höfuðborgarsvæðinu verður ekki að fullu náð fyrr en búið er að byggja yfir Landspítala -- háskólasjúkrahús á einum og sama staðnum. Á þetta höfum við í Samf. lagt ríka áherslu.
Ég fagna því að hæstv. heilbrrh. hefur fullan skilning á því og bersýnilega eru í gangi aðgerðir sem gætu leitt til þess að þessu yrði hrint í framkvæmd á allra næstu árum.
Ég vil í tilefni af fyrirspurn hv. þm. Jónínu Bjartmarz og svari ráðherrans rifja það upp að nokkrir þingmenn Samf. hafa einmitt lagt fram þáltill. sem felur í sér að í þetta verði ráðist og þar er jafnframt bent á þann möguleika að ef stjórnvöld á annað borð ætla sér að selja ríkisfyrirtæki eins og Landssímann væri sanngjarnt að andvirðinu yrði veitt til þessa mikilvæga málstaðar.