Ferill 733. máls. Aðrar útgáfur af skjalinu: PDF - Word Perfect.
149. löggjafarþing 2018–2019.
Þingskjal 1368 — 733. mál.
Svar
umhverfis- og auðlindaráðherra við fyrirspurn frá Birni Leví Gunnarssyni um auglýsingar á samfélagsmiðlum.
1. Hvaða útgjöld hafa ráðuneytið og stofnanir sem undir það heyra haft ár hvert frá árinu 2015 vegna auglýsinga eða kostaðrar dreifingar á samfélagsmiðlum, svo sem á Facebook, Instagram, YouTube og Twitter?
Upplýsingar um útgjöld umhverfis- og auðlindaráðuneytisins og stofnana sem undir það heyra og hafa einhver útgjöld vegna auglýsinga eða kostaðrar dreifingar á samfélagsmiðlum ár hvert frá árinu 2015 má finna í eftirfarandi töflu:
| Heiti stofnunar | 2015 | 2016 | 2017 | 2018 |
| Umhverfis- og auðlindaráðuneytið | 30.000 | 27.000 | 28.000 | 73.000 |
| Umhverfisstofnun | 111.439 | 210.017 | 151.940 | 285.540 |
| Þingvallaþjóðgarður | 0 | 10.000 | 0 | 0 |
| Úrvinnslusjóður | 0 | 0 | 0 | 100.000 |
| Skipulagsstofnun | 618 | 24.561 | 10.506 | 13.858 |
| Landmælingar Íslands | 0 | 0 | 0 | 9.700 |
| Veðurstofa Íslands | 0 | 0 | 5.300 | 0 |
2. Hvaða stefnu hefur ráðherra að því er snertir auglýsingakaup á samfélagsmiðlum?
Ekki hefur verið mótuð stefna um auglýsingakaup umhverfis- og auðlindaráðuneytisins á samfélagsmiðlum af hálfu ráðherra. Á sínum eigin samfélagsmiðlum hefur ráðherra ekki keypt auglýsingar.
3. Hvernig telur ráðherra það að kaupa auglýsingar eða kostaða dreifingu á erlendum samfélagsmiðlum samræmast stefnu ríkisstjórnarinnar um að efla íslenska fjölmiðla?
Markmið ríkisstjórnarinnar um eflingu fjölmiðla tekur til starfsumhverfis fjölmiðla í víðu samhengi, sbr. skýrslu mennta- og menningarmálaráðuneytisins um rekstrarumhverfi fjölmiðla frá árinu 2018 og drög að frumvarpi mennta- og menningarmálaráðherra um opinberan fjárstuðning við öflun og miðlun frétta og fréttatengds efnis sem kynnt hefur verið í samráðsgátt stjórnvalda. Auglýsingamarkaðurinn skiptir þar miklu máli ásamt öðru og er mikilvægt að gagnsæi ríki um kaup opinberra aðila á auglýsingum, sbr. umfjöllun í framangreindri skýrslu mennta- og menningarmálaráðuneytisins. Er einnig mikilvægt til lengri tíma litið að fylgst verði með þróun auglýsingamarkaðar og hlutdeild samfélagsmiðla á honum og hvaða áhrif markaðshlutdeild slíkra miðla hefur á auglýsingatekjur annarra fjölmiðla. Eins og sjá má af svari við 1. tölul. fyrirspurnarinnar hefur umfang auglýsingakaupa og kostaðrar dreifingar á samfélagsmiðlum hjá umhverfis- og auðlindaráðuneytinu og stofnunum sem undir það heyra verið takmarkað á umliðnum árum. Verður ekki séð, að svo stöddu, að slík auglýsingakaup raski stefnu ríkisstjórnarinnar um eflingu íslenskra fjölmiðla.
Vert er að benda á að Umhverfisstofnun hefur veigamiklu hlutverki að gegna við fræðslu og miðlun upplýsinga til almennings, en það er sú stofnun ráðuneytisins sem er með hæstu útgjöldin til auglýsinga eða kostaðrar dreifingar á samfélagsmiðlum, sbr. töflu í svari við 1. tölul. fyrirspurnarinnar.
